مين هو المصري؟

الإنتماء للوطن شيء كبير جدا و لا ينطبق بالضرورة على كل من يجمعهم مكان محدد حتى و لو كان دولة معينة يحملون جنسيتها. الوطن له معنى كبير جدا ينطوي ليس فقط على مكان و لكن على مكان و مباديء و قيم و أسس يتفق أهلها على الارتباط بها. و بالتالي مش كل الي عايش في مصر ممكن يتقال عليه مصري. ألي يدرك معنى الوطن الحقيقي هو ألي يكون مرتبط بالقيم و المعايير و المكان و الأسس ألي تمثل الوطن ده.

البلد ألي يكون ألي مسيطرين عليها من غير الفاهمين أو مرتبطين أو مدركين لمعنى كلمة وطن يكون بلد تحت الاحتلال ..... أيوة تحن الاحتلال.... الإحتلال مش شرط يكون من الغريب أو الأجنبي و الاحتلال مش شرط يكون من برة. الاحتلال معناه لما مجموعة من غير المنتمين لمباديء و معنى و مفهوم و احساس الوطن تسيطر عليه و على المنتمين الحقيقيين للوطن ده.... حتى لو كان ألي مسيطريين دول من ألي عايشين في البلد. مصر وقعت في أيديهم من زمان و أحداث القاهرة يوم 25 مايو كانت مجرد معركة من معارك الاسترداد.

حاسس إني محتل و عرفت قوي إزاي إن إحساسي قُريب جدا من احساس العراقيين لما شفتهم في حفلة المغني العراقي إلهام مدفعي هنا في لندن.... شفت إزاي كانوا بيغنوا و يرقصوا في حماسة شديدة و علم العراق مرفوع وراهم و كل البريطانيين الحاضرين منبهرين بالحماسة ألي جوة المسرح... و في الآخر غنوا النشيد الوطني العراقي كلهم معا بعض و غنيت معاهم و كنت فرحان جدا بس ما كونتش مدرك كلية لاحساسهم.... كنت حاسس إتهم بيقولوا "احنا لسة هنا..." "احنا موجودين..." .... "لسة ماموتناش...."..... دلوقتي حاسيت أكتر بمعنى الكلمة دي و دلوقتي حاسس اني عايز أقولها..... "احنا لسة هنا..." "احنا لسة هنا...." و هنرجع في يوم من الأيام و نستردها..... لازم الحق يرجع لأصحابه......

كان نفسي قوي أكون معاكو و أنتو بتدافعوا عنها... كان نفسي قوي أدافع معاكو.... لكن الوقت لسة مجاش.... لكن لما ييجي مش هتأخر سانية واحدة.... قولوا لهم إن في مصريين برة كتير حاسيين بيهم و بمصر و كانوا يتمنوا يكونوا معاهم و نفسهم يساعدوهم..... قولوا لهم البلد لسة بلدنا..... البلد دي بتاعت ألي فهمها و بس.... مش بتاعت ألي خدها بالدراع و البلطجة.... قولوا لهم أنتو مش لوحدكم..... قولوا لهم كلنا محتلين..... قولوا لهم..... رفعتوا راسنا......